ಹನಿ ಹನಿ ... ಮಳೆ ಹನಿ

ಮಳೆಯ ಹನಿಗಳ ಸದ್ದನು ಆಲಿಸಿ.. ಅದ ನಾ ಇಲ್ಲಿ ಈ ಕವನವಾಗಿ ಬರೆಯುವ ಯತ್ನ ಮಾಡಿದೆ ..

ಸ್ತಬ್ಧ ಸಂಧ್ಯಾಕಾಲದ ಮೌನವ
ಮರೆಸಿ ದಿನದ ದಣಿವ ನೀಗಿಸೋ
ನೀ ಕರೆತಂದೆ ಮನದ ಉಲ್ಲಾಸ
ಹನಿಯೂಡುತ ಬರುವ ಹಾದಿಯಲಿ

ನಡುಹಗಲಲಿ ನಿನ್ನಯ ಯೋಚನೆ
ಈ ಗಳಿಗೆ ಬರುವೆ ನೀ ಎನ್ನುತಾ
ನಾ ಗೂಡ ಸೇರುವೆನು ಸಂಜೆ
ನೀ ಹನಿಯೂಡಿ ನೆನೆಸುವ ಮುನ್ನ

ಬರದಿರು ನೀ ಬಂದು ನೆನೆಸದಿರು
ನನ್ನಯ ಗೂಡನು ಸೇರುವೆ ನಾ
ಹಾದಿಯ ಕಾಯುತ ಬರಮಾಡುವೆ
ತಂಪು ಹನಿಯ ನಿನ್ನ ಆಗಮನವ

ಶೀತಲ ಹನಿಯ ಸ್ವರ್ಣಸ್ಪರ್ಶವು
ಸೌಮ್ಯವಾಗಿಸಿತು ಪುಳಕಿತ ಮನವ
ನೆನೆ ಗೂಡನು ಸೇರುವ ಮುನ್ನಾ ನೀ
ಹನಿಯೂಡುತ ಹೇಳುತಿಹನು ವರುಣ

ಬಂದೆ ಒಲವ ನಾದದಿ ಹನಿಯಾಗಿ
ತಂದೆ ನೀ ಜೊತೆ ಶೀತಲ ಸುಧೆಯ
ಮನದಲಿನ ಚಿಂತೆಯ ನಿನ್ನಲಿ ತೇಲಿಸಿ
ಹನಿಯೂಡುವ ನಿನ್ನ ನೋಡಿ ಮೈಮರೆತೆ