ಕಣ್ಣೀರಾಗಿ ಹನಿಯಿತು

ಹಸಿರಾಗಿದ್ದ ಸಂತಸದ ದಿನವ ಕಳೆಯುವ ವೇಳೆಯಲಿ ಅರಿಯದೇ ನಾ ನೋಯಿಸಿದ ಆ ಮನವ ....

ರವಿಕಿರಣದ ಜೊತೆ ಆರಂಭವಾದ
ನನ್ನೀ ನಿಯತವ ಚೂರು ಬದಲಾಗಿಸಿ
ದಿನಚರಿಯ ಮರೆತು ಹೊಸತನು
ಕಂಡು ಅನುಭವಿಸಿ ಕಳೆದೆ ದಿನವ

ಎಂದಿನಂತೆ ಇದ್ದರೂ ಬದಲಿಸಿಹೆ ನಾ
ಮುದ್ದಾಗಿಹುದಾದರೂ ದಣಿವ ನಾ ಕಂಡೆ
ಭಿನ್ನ ಕಾಯಕವ ನಾ ಪಡೆದು ಕಳೆದೆ
ಹೊಸತಾಗಿ ತಲುಪಿದೆ ದಿನದ ಗುರಿಯ

ಯಾವ ಗಳಿಗೆಯೂ ಏನೋ ಕರೆದು
ಒಯ್ದಿತು ನನ್ನ ಕೆಲ ಕ್ಷಣಗಳ ಮಿಲನಕೆ
ಯಾರ ದೃಷ್ಟಿ ತಗಲಿತೋ ನಾ ಕಾಣೆ
ವರುಷದ ಗೆಳೆತನ ಕಂಡಿತು ಬಿರುಕು

ಗುರಿ ಮುಟ್ಟಿದ ಸಂತಸವು ಕರಗಿ
ದುಃಖದ ಕಣ್ಣೀರಾಗಿ ಹನಿಯಿತು ನಯನದಿ
ನೋಯಿಸದ ಮನವ ಒಂದು ಕ್ಷಣದಿ
ಚೂರಾಗಿಸಿ ವ್ಯಥೆಯಲಿ ಕರೆದೊಯ್ಯಿತು

ಮುಂಜಾವದ ಸಿಹಿಗನಸ ನನಸಿನ
ಹಾದಿಯ ಹರುಷದ ಕೆಲ ಹೆಜ್ಜೆಯೂ
ಮುಸ್ಸಂಜೆಯ ರವಿಯ ಕಿರಣದ
ಜೊತೆಯಲಿ ಕತ್ತಲಿನೆಡೆ ಸಾಗಿತು

ದುಃಖಿಸಿದ ಮನದ ಬಳಿ ಕ್ಷಮೆಯ
ಕೇಳಲು ಪದಗಳು ಕಾಣದೆ ಪರಿತಪಿಸಿತು
ಮಾತನಾಡಲು ಮುಂದಾದರೆ ಕಂಠವು
ಸಮ್ಮತಿಯ ನೀಡದೆಂದಿತು ಆ ದಿನವು